Tondu niumenyaga mucayo wa ng'ondu tegera ngoro yakwa matu
Tondu nindagituikire wa ruru rwaku nawe ugiitikira kundiithia
Ndiithagia weru ini uria wi nyeki nduru mai ini mari na uhuruko
Mbere yaku gutiri kiugo "Kuremwo" witagwo Kihoti wa mothe
Mugwetereri ndari hindi akerira, muguthaithi ndagaconoka
Nikio ndatira maitho makwa na iguru kuria uteithio wakwa umaga
Gitumi ndi mundu na gutiri kindu ona ki ingihota gwicariria.
Ii niku mundu angikiurira kwihithe oime uthiu waku mwathani
Guoko gwaku gwatamburuka kwihinya kugiraga mundu kwa ngoma
Kinyumbire ngoro ya gugwitiga we watharire muoyo wakwa
Ndarite oo riri ndari kwa ngoma na ngakinya ukinjohora minyororo
Mwiri uyu ni hema na niubataire na nikio unduragia muoyo
Utanarikia nanie ngome mbirira ini ndahoya utwaranage nanii
Niguo ndikagere njira ya riuriro njiguithie roho waku uru
Ndeithia kuhutatire umundu wa thi, njathikage ni kiugo giaku
Kou mbirira ini nduririkanagwo aria akuo matikugocaga
Nanikio witagwo wa aria mari Muoyo, tondu ndi muoyo thikiriria,
Ndahoya uture unyitite guoko tha ciaku iture iguru riakwa
Tondu thi ona korwo no injagirire ndi nama ndii tura muno
Onaingiakira manyumba manene ngie na ruru rwa mburi na ngombe
Indo ciothe njega cionekage gwakwa Ngai utari ho ndiiganiire,
Kohelethu oigire gutiri ungihota kuria na gukena utari ho,
Kindathimire wira wa moko makwa ndeithike na ngutungatire
Gukira maundu mothe ndaguthaitha tura undiirire githithi,
Unjehererie thu cia gikeno giakwa muturire wakwa ugacire
Namuthi waku wa kwirihiria wakia ugacaira ngoro yakwa
Nitondu ndiaga kaundu ndaneka Ngai wakwa gagigukenia
